१५ बैशाख २०८२, काठमाडौ ।
राजसंस्था र हिन्दुराष्ट्र पुनःस्थापनाको माग गर्दै आएका सबै शक्तिहरू सोमबार एउटै मञ्चमा देखा परेका छन्। राजनीतिक एजेण्डा एउटै भए पनि एकजुट हुन नसकेका उनीहरू आज कमल थापा नेतृत्वको राप्रपा नेपालले , आस्थाका बन्दीहरुको रिहाई , राजसंस्था पुनःस्थापना र धर्मनिरपेक्षता खारेजीको माग गर्दै आयोजना गरेको कार्यक्रममा एकसाथ देखिएका हुन ।
कमल थापासहित राप्रपाका अध्यक्ष राजेन्द्र लिङ्देन, राष्ट्रिय शक्ति नेपालका अध्यक्ष केशरबहादुर विष्ट, राजसंस्था पुनःस्थापनाका लागि संयुक्त जनआन्दोलन समितिका संयोजक नवराज सुवेदीलगायत कार्यक्रममा उपस्थित थिए। नेपाली कांग्रेस (बिपी), शिवसेना नेपाल र दुर्गा प्रसाईं नेतृत्वको नागरिक बचाउ अभियानका नेताहरू पनि कार्यक्रममा पुगेर सम्बोधन गरेका थिए । 
राप्रपा नेपालका अध्यक्ष कमल थापाले राप्रपा प्रमुख शक्ति भएकोले आन्दोलनको नेतृत्व गर्न आव्हान गर्दा सबै कार्यकर्ताले ताली बजाएर स्वागत गरेका छन । राप्रपा अध्यक्ष राजेन्द्र लिङ्देनले सबै कुरा बिर्सेर अब सबै एक भएर अगाडि बढनु पर्ने भन्दै सहकार्यको लागि आफू र पार्टी तयार रहेको बताए। 
