काठमाडौँको शेषनारायण मन्दिरमा बिहानैदेखि दर्शनार्थीको घुइँचो लागेको छ। दक्षिणकाली नगरपालिकाको फर्पिङमा पर्ने उक्त मन्दिरमा प्रत्येक वर्ष असार शुक्ल एकादशीका दिन मेला लाग्ने गर्छ ।
यहाँ आउने भक्तजनलाई व्यवस्थित गर्न स्थानीय जनप्रतिनिधि र सुरक्षाकर्मी खटिएका छ्न्। काठमाडौँ उपत्यकाका चार नारायणमध्ये शेषनारायण मन्दिरलाई एक महत्त्वपूर्ण तीर्थस्थलका रूपमा लिइन्छ। असार शुक्ल एकादशीदेखि कात्तिक शुक्ल एकादशीसम्म चार महिना भगवान् विष्णु क्षीरसागरमा शयन गर्नुहुने हिन्दू धर्मावलम्बीहरूको विश्वास छ।
मन्दिरमा आजको दिन दर्शन तथा उपासना गरेमा पारिवारिक सुख, शान्ति तथा पुण्य सञ्चय हुने जनविश्वास रहिआएको छ। यसैबीच आज चागुनारायण , बुढानिलकण्ठ लगायत देशभरका नारायण मन्दिरहरुमा विष्णुको दर्शन गर्न भक्तजनको घुइँचो लागेको छ।
तुलसीलाई विष्णुको प्रतीकका रूपमा मानिने भएकाले घरघरमा तुलसीको बिरुवा सार्ने धार्मिक प्रचलन चलि आएको छ ।
