९ माघ २०८१, सोलुखुम्बु।
सोलुखुम्बुको नेचासल्यान गाउँपालिकाको प्रशासकीय भवन निर्माण कार्य सम्पन्न भएको छ । गत आर्थिक वर्ष २०८०/८१ को वैशाख मा सम्झौता गरी जेठ १६ बाट निर्माण सुरु गरिएको भवनको निर्माण कार्य हालै सम्पन्न भएको हो ।
निर्माण कम्पनी आरोन ओम बालाजी इ आर रामेछापले निर्माण कार्य सम्पन्न गरी गाउँपालिकालाई बुधबार चाबी हस्तान्तरण गरेको छ । गाउँपालिका अध्यक्ष धनजन राई र उपाध्याय बिना राईले चाबी लिँदै निर्माण कम्पनीलाई समयभित्रै भवनको निर्माण कार्य सम्पन्न गरेकोमा धन्यवाद व्यक्त गरेका छन् । अध्यक्ष राईले फागुन ७ गते प्रजातन्त्र दिवसको अवसर पारेर भवनको औपचारिक रूपमा उद्घाटन गरिने जानकारी दिए ।
नेचासल्यान गाउँपालिकाको ४० प्रतिशत र सङ्घ सरकारको ६० प्रतिशत बजेटको लागत साझेदारीमा प्रशासनिक भवन निर्माण गरिएको गाउँपालिकाले बताएको छ । २०८१ वैशाख १० गते गाउँपालिका अध्यक्ष धनजन राई र उपाध्यक्ष बिना राईले भवनको संयुक्त रुपमा शिलान्यास गरेका थिए । पालिकाले फागुन महिना देखि नया भवन बाट सेवा दिने तयारी गरेको छ ।
