भदौ १३, २०८१ काठमाडौं ।
नेपाली कांग्रेसका शीर्ष नेताहरुको बैठक आज देउवा निवासमा बस्ने भएको छ । केन्द्रिय समिति बैठकमा पेस भएका दुई महामन्त्री गगन थापा र विश्वप्रकाश शर्माका प्रतिवेदनमा छलफल गर्न पार्टी सभापति शेरबहादुर देउवाले बैठक बोलाएका हुन् ।
बैठक सभापति देउवाको निवास बुढानीलकण्ठमा बिहान नौ बजेका लागि बोलाइएको छ । सभापति देउवाले उपसभापतिद्वय पूर्णबहादुर खड्का र धनराज गुरुङ तथा महामन्त्रीद्वय गगन थापा र विश्वप्रकाश शर्मालाई बोलाएको देउवाको सचिवालयले जनाएको छ ।
गत बुधबारदेखि सुरु भएको केन्द्रीय समिति बैठकमा महामन्त्री शर्माले संशोधित प्रस्ताव पेस गरेका छन्, जसमा राष्ट्रपति एकपटक, प्रधानमन्त्री दुईपटक, मन्त्री तीनपटक र सांसद चार पटकभन्दा बढी हुन नपाउने नीतिगत व्यवस्था गर्नुपर्ने उल्लेख छ । साथै उनले चुनावी गठबन्धन पनि अनुपयुक्त भएको उल्लेख गरेका छन् ।
अर्का महामन्त्री थापाले सांगठनिक प्रस्तावमा चुनावी गठबन्धन गर्न नहुने मत गत फागुनको बैठकमा नै पेस गरेका थिए । थापाले पूर्ववत् प्रतिवेदन केन्द्रीय समिति बैठकमा पनि पेस गरेका छन् । महामन्त्रीद्वयको प्रस्तावले तनाव रहेका देउवा लगायतका शिर्ष नेताहरुले प्रस्ताव फिर्ता लिन महामन्त्रीहरि लाई आग्रह गर्ने त्यसो नभए पारित हुन नदिने रणनीति अख्तियार गर्ने तयारी गरेका छन् ।
